Assam Rifles sawn chhuahna tura Mizoram sawrkar, Assam Rifles leh Central sawrkar te inremna Memorandum of Understanding siam, hun engemawchen Home Ministry in an kawl tawh chu tun dinhmuna mutan nia a ngaih thu Chief Minister hian a lo sawi a. Union Home Minister Amit Shah hian kar khat chhunga he MoU hi lo chinfel a tum tur thu a hrilh a ni.

February ni 26, 2024 khan Assembly Session ah VL Zaithamzama, MLA chuan, "Aizawla Assam Rifles te hi Home Ministry thuchhuak angin ni 31.05.2019 hnua Zokhawsang hmuna insawn tura tih an ni a. Engvanga vawiin ni thlenga la insawn lo nge an nih?," ti a a zawhna chu Home Minister K. Sapdanga chuan, "Assam Rifles-te Zokhawsang-a an insawn chhuahna tur atan a tihtur zawng zawng hi Mizoram Sawrkar chuan a tizo vek tawh a, Assam Rifles lam hian insawnna atan MoU sign nise a ti a, draft MoU an siam hi MHA ah an thehlut a, chu pawh chu Mizoram Sawrkar chuan comments hi 08.09.2023 khan a thawn thla tawh a, MHA lam chhanna hi nghah mek a ni." tiin a chhang.

MNF Sorkar lai khan tuna Union Home Minister Amit Shah hian Chief Minister kalchhuak ta, MNF President Zoramthanga hnenah  tum eng emawzat Assam Rifles te chu tuna an awmna hmun atanga Zokhawsanga sawn chhuah an nih tur thu hi a lo hrilh tawh thin a, chu chu Mizoram mipui hriatah puanzar leh thin a ni a, hetiang thu bawk hi Chief Minister thar Lalduhoma bulah Union Home Minister hian lo sawi lehin, vawiin thlengin a hlawhtlinna kan la hmu thei ta chuang lo a ni.

February ni 19, 2019 khan Ministry of Home Affairs chuan Mizoram Chief Secretary hnenah lehkha hmanhmawhthlak a thawn a, chu chu Aizawl khawpui laili atanga Assam Rifles Battalion Headquarters, May 31, 2019 ral hmaa Zokhawsanga  sawn chhuahna tur thu a ni a, an mamawh tur- tui, eng leh inkalpawhna kawng pawh April ni 30, 2019 ral hmaa peih fel thei turin Mizoram Sorkar a ngen nghal bawk.

Hei hi Mizoram Sorkar pawhin bawhzui nghalin theihtawp a chhuah a, AR te mamawh tur an chenna building, tui leh eng bakah inkalpawhna thlengin a peihfel vek hman. Chief Minister hlui Zoramthanga hovin Mizoram Sorkar mi pawimawhte leh Assam Rifles hotute pawh vawi tamtak Zokhawsanga AR insawn chhuah dan tur sawiin an thukhawm zing hle a nih kha.

April ni 2, 2023 khan Amit Shah hi Mizoram ah lokal in, Zokhawsanga AR insawnna tur Lammual-ah a rawn hawng a, "Assam Rifles te hi an insawn ngei dawn a. Tuna an awmna hmun hi Aizawl tan hmun pawimawh a nih angin tangkai taka hman zui zel a ni dawn a ni," tiin a lo sawi tawh bawk a. A taka thlen hun Mizo mipuite'n kan nghakhlel tlang hle a nih hi.

Assam Rifles te sawn chhuak turin Mizoram Sorkarin hma a la ngar ngar a, March 23, 2024 khan khatih laia Lok- Sabha MP C. Lalrosanga chuan Union Home Minister Amit Shah a hmu ve leh a, Home Minister hian a sawi thin, AR te Zokhawsangah an in sawn ngei ngei dawn, tih bawkin MP kha thu a lo thlah leh a ni.

July ni 4, 2024 khan Chief Minister Lalduhoma hovin Minister, Assam Rifles hotute leh Mizoram Sorkara mi pawimawhte'n Zokhawsanga AR sawn chungchang an ngaihtuah ho leh a. Chief Minister chuan, Sorkarna an chelh hnuah AR sawn chungchang hi engmah kan la sawi chhuak lo, a ti a. "Central sorkar rilru dik tak hriat kan duh avangin kan ngai chang mek a ni," a ti.

Chief Minister chuan, "Thla hmasa ni 20 a Union Home Minister Amit Shah ka kawm tumin amah zawkin a sawi chhuak a, 'Aizawl khawpui laili atanga Zokhawsanga AR sawn chhuah hi thutlukna siam fel tawhsa a ni a, hmalak tawh chin te enin August thla-ah rawn zin ka tum a ni,' tiin. Chuvangin vawiinah Joint meeting hi kan buatsaih ta a ni, Chief Minister chuan a ti a.

Tarlan tawh angin, July ni 11 khan Amit Shah hian Chief Minister chu telephone a rawn bia in, karkhat chhunga MoU siamfel ngei a rawn tiam a, vawiin thlengin thu thar hriat tur a awm ta rih lo.

Zoram Today thu hriat danin, MoU chungchangah Sorkar hmasa khan MoU tur a draft chu Ministry of Home Affairs ah a thawn thla tawh a, hei hi Home Ministry hian a la pawm thei lo. Ministry of Home Affairs lam hian a hranin draft an nei ve a, chutah chuan Mandir, Quarter Guard leh Commandant Residence hi chhuahsan lo turin an siam nia hriat a ni. Mahse, April ni 2, 2023 a Amit Shah Aizawl lokal hnu khan, Assam Rifles hian Ministry of Home Affairs thupek angin revised draft MoU an siam leh a, chu chu Mizoram Sorkarah an thehlut a ni.

Mizoram Sorkara Home Department chuan hemi chungchanga line department kaihhnawih te telna Working Group a din nghal a, Ministry of Home Affairs thupek angin Mizoram Sokarin revised draft MoU chu September, 2023 khan a thawn thla ve leh a, Central leh Mizoram Sorkarin he thil ngaihtuah fel hi tuna an mu tan ber chu a ni. Engtik ah tak ti fel thei ang maw?